Avokati i licencuar nga Gjykata Speciale Vehbi Beqiri thotë se masa e paraburgimit ndaj krerëve të OVL UÇK-së ishte e rëndë.

Beqiri në “Debat Plus” ka thënë se shoqëria kosovare nuk ishte e përgatitur për veprimet e Gjykatës Speciale.

“Shoqëria jonë e sidomos organizatat e dala nga lufta nuk kanë qenë të përgatitura për këto lloj situatash juridike. Është një dobësi e jona si shoqëri që prej një kohe të gjatë kemi pritur se çfarë po ndodh me Gjykatën Speciale. Derisa atje janë zhvilluar hetimet tek ne nuk është përgatitur opinioni. Tash po del se jemi të papërgatitur dhe mund të jemi viktimë e çfarëdo spekulimi që bëhet”, tha ai.

Avokati thotë se krerët e OVL-UÇK nuk mund të akuzohen për faktin se disa dokumente janë gjendur në zyrat e tyre.

Beqiri shpjegon edhe rastet kur aplikohet paraburgimi nga Gjykata Speciale.

“Arsyeja e parë është ikja, gjë që në Kosovë nuk ka pasur raste të ikjes. Kjo është një gjë e mirë që ka ndodh. Arsyeja e dytë është ndikimi në dëshmi dhe dëshmitarë”.

Avokati thotë se megjithatë Gjykata Speciale nuk do të dënojë asnjë person pa pasur prova të administrueshme.

“Gjykata nuk do të gjykojë në bazë të thash e themeve”.

Avokati thotë se të ftuarit e Speciales para se të deklarohen duhet të dëgjojnë avokatët e tyre.

“Deklaratat e tyre të bujshme mund t’iu kushtojnë më vonë”, deklaroi avokati Vehbi Beqiri.